Your official National World Cup poem: An Ode Tae Le 2018 Coup Du Monde

Stuart Paterson is BBC Scotland's first poet in residence.

ODE TAE LE 2018 COUP DU MONDE

...

Ye’ll have had yer World Cup then,

ye’ll have had yer VAR,

ye’ll have had yer 1966

tae last ye til Qatar.

...

Ye’ll have had yer share o Shakespeare,

ye’ll have had yer share o hype,

ye’ll have had yer share o penalties

an waistcoats an the like.

...

Ye’ll have had yer talk o state suppression,

bribes an mafiosi,

ye’ll have had yer thochts an bets

an ABE tae win the trophy.

...

Fair play, the English manager

an players showed grace an spirit

(though there wid be nae livin wi them

if they’d gan on tae win it).

...

The michty fell along the wey,

the Germans early offski,

nae African teams in the last sixteen,

nae Salah or Lewandowski.

...

An soon nae Suarez, Ronaldo,

Iniesta, Lionel Messi,

an nae mair Neymar collapsin

like he’d jist been shot the jessie.

...

Kenspeckle are allegiances,

gey orra wur traditions,

fae roarin on the Mexicans

tae shoutin for Tunisians,

...

but despite the talk o Novichok,

annexations, repercussions,

we dingied yon an shouted on

the unexpected Russians.

...

An when the Russians lost we fun

wur perfect fitba nation;

too wee, too dour, too thick, too puir -

we aw became Croatians.

...

We kennt they widnae win it but

nae matter, still felt happy

when Pussy Riot ran on the pitch

an high-fived wee Mbappé.

...

But the winners o the Real World Cup

are nae prima donna skyvers –

gie a gallus roar for the Wild Boars

an their unnerage team o divers.

...

We’ll have had wur share o politics

fae a fast-fragmentin nation,

we’ll have had wur share o Brexit,

we’ll have had wur resignations,

...

we’ll have had wur unwanted veesit

fae the orange blimp cried Trump,

we’ll have had wur Wimbledon

an we’ll have had wur hottest month.

...

We’ll have had wur World Cup then

til the next yin comes along

an we’ve forgot that we’re no there

an we’ve forgot that bloody song.